11. De sancto Leonhardo.

In 1. Vesperis.

Antiphonae.

1. Gaude natalitia

Leonhardi clari,
O mater ecclesia,
Digne venerari.

2. Ab adulescentia

Iugum portat Dei

Cuncta vitans noxia

Puer multae spei.

3. Disciplinae ferula
Sese castigavit
Et virtutis gerula
Deo mancipavit.

4. Exemplis aedificat

Claris orbem totum,
Doctrina rectificat
Notum et ignotam.

R. Dominus dedit doctorem

Suis hunc fidelibus,
Inter claros clariorem

Doctrina et moribus,
Imbrem pluat dulciorem

Ut de Dei fontibus.
V. Reportat fideliter

Cum lucro talentum,
Pro quoque feliciter

Reportavit centum.

Ad Magnificat.

A. Virgo mater ecclesia,
Perenni digna gloria.

Gaude iubilando,
Dulci plane memoria
Leonhardi insignia

Festa celebrando.
Cordis dilata gremium
Confessoris praeconium

Huius hymnizando.

Ad Matutinum.
Imitatorium.

Regem regum adoremus
Dulci cordis laetitia,

Iucundantes celebremus
Leonhardi sollemnia.

In 1. Nocturno.
Antiphonae.

1. Suo dat in tempore
Leonhardus fructum
Plurimo cum foenore
Dei per conductum.

2. Qui rupisti vincula
Ferri captivorum,
Cordium piacula
Rumpe ferreorum.

3. Istum in spe, Domine,
Sistis singulari,
In tuo qui nomine
Studuit ditari.

4. Verba huius auribus
Quia percepisti,
Deus, ipsum coetibus
Sanctorum iunxisti.

5. Honore et gloria
Digne coronatur,
Bona super omnia
Dei cum locatur.

6. Confidit in nomine
Tuo tuus verna,
Dulcis Iesu Domine,
Vita pro superna.

Responsoria.

1. Lilio floridior,
Viola decentior

Sacer Leonhardus,
Exortus nobilibus
Valde de parentibus
Redolet ut nardus,
V. Qui per annos puberes
Fructus auxit uberes,
Non ad bonum tardus.

2. Accepit a Franciae
Rege tantum gratiae

Vir Dei beatus,
Visitat quos, libere
Solvat ut a carcere
Captis miseratus.
V. Derivat ad alios
Opis suae radios
Homo Dei gratus.

3. Leonhardus in doctorem
Optatus ecclesiae

Onus amat non honorem,
Gustu sapientiae

Plus ardescit in ardorem
Virtutis et gloriae;

V. Caritatis facibus,

Fructibus iustitiae
Laetatur amictibus
Redimitus gratiae.

4. Fugam rapit exsulem,
Ne surgat in praesulem

Desertum petendo,
Victitat frugaliter
Ubi et feliciter
Mundum fugiendo.
V. Captivi hunc adeunt,
Secum fractas advehunt
Catenas gaudendo.

In 2. Nocturno.
Antiphonae.

1. Non accepit munera
Super innocentes
Vehens super aethera
Christum confitentes.

2. A te petit, Domine,
Vitam, Iesu Christe,
Iugi quam certamine
Merebatur, iste.

3. Deus, super maria
Istum qui fundasti,
Eius per suffragia
Captivos salvasti.

4. Hunc a malignantium
Conventu protexit
Deus et regnantium
Ad coetum provexit.

5. Habitat in atriis
Domus salvatoris,
Cuius in obsequiis
Cunctis vixit horis.

6. Leonhardus floruit
Iustus sicut palma,
Provehi promeruit
Ex hoc ad agalma.

Responsoria.

1. Angelorum munia
Sanctorumque studia

Prorsus aemulatur,
Complet ministeria,
Enodat mysteria,

Divina profatur ;
V. A Deo sagacitas

Ipsi serpentina
Est atque simplicitas

Data columbina.

2. Vita floret fulgida,
Verba serit vivida,
Opis dat tutelam,
Mentes purgat sordidas,
Culpas fugat morbidas
Divam per medelam ;
V. Totis studet nisibus,
Fuget ut ab omnibus
Culpae corruptelam.

3. Leonhardus mitibus
Victus regis precibus

Vocatus adcurrit,
Reginae puerperae
Precis salutiferae
Medela sucurrit;
V. Haec ad beneficia
Regia familia

Gratulans concurrit.

4. Auri sprevit munera
Argentique pondera.

Quae rex offerebat ;
Ista, quae decipiunt,
Mibi non expediunt,
Regi respondebat ;
V. Quaerens spiritalia
Tantum saecularia
Cuncta fugiebat.

In 3. Nocturno.
Ad Cantica.

A. Dei vir aetherea

Fungens dignitate,

Nos absolve ferrea
Captos voluntate.

Responsoria.

1. Silvae dato spatio,
Facto monasterio

Inibi d gebat,
Multis accurrentibus
Et secum manentibus

Manum porrigebat;
V. Carnem parcimonia

Docens castigare,
Sine castrimargia

Domino vacare.

2. Septenae familiae
Sua de progenie

Ad eum venere,
Quibus partem tribuit
Nemoris et monuit
Sibi commanere;
V. In sancto proposito
Cuncti quidem subito
Multum profecere.

3. Ob defectum aqueum
Fodi iubet puteum

Loco sicciori,
Quem precum instantia
Dei replet gratia

Aqua largiori ;
V. Sanctus laudum munia

Mente laetiori
De aquae dat copia

Deo largitori.

4. In via mirabili
Cursu istum stabili

Dominus deduxit,
Constantem in latria
Digne ad palatia

Caeli introduxit;
V. Vincentem aromata

Odore virtutis
Locat ad agalmata

Aeternae salutis.

In Laudibus.

Ad Cantica.

A. Leonhardum laudibus
Omnes veneremur,
Laudes eius cantibus
Digne modulemur.

Ad Benedictus.

A. Benedictus oriens,
Ex alto progrediens,
Leonhardi iugibus
Meritis et precibus

Largire virtutem
Et da cum caclestibus
Nobis te colentibus

Pacem et salutem.

Per Horas.

Ad Primam.

A. Non hic mercenarius
Nec lupus crudelis
Fuit, sed vicarius
Domini fidelis.

Ad Tertiam.

A. Leonhardus iugiter
Lucrando salutem
De virtute fortiter
Ibat ad virtutem.

Ad Sextam.

A. Leonhardus triticum
Erogat insignis
Conservis dominicum
Et verbis et signis.

Ad Nonam.
A. Leonhardus, civibus
Sociatus caeli,
Nobis prosit omnibus
Precatu fideli.

In 2. Vesperis.
Antiphonae.
1. Adiutor carceribus
Adest innodatis
Intercessionibus
Leonhardus gratis.

2. Verbi sacri framea
Revocatas iste
Erroris ab alea

Tibi refert, Christe.

3. Vitae reddit sobriae
Sermone carnales,
Ad vias iustitiae
Trahens bestiales.

4. Magnus est in gloria
Felix Leonhardus,
Tota in ecclesia
Redolens ut nardus.

Ad Magnificat.
A. Ave, Iesu, salus orbis,
Cunctis nostris assis morbis

Vivax per remedium,
Leonhardi viva prece
Nos ab omni mundans faece

Peccatorum omnium
Sic, ut sit aeterna quies
Nobis in te solo, qui es

Solus cordis gaudium.