14. In Nativitate BMV.

1. Ave, Sion filia,

Diu exoptata,
Prophetarum praevia

Voce nuntiata,
Mihi da subsidia

Vincendi peccata,
Cuncta cedant vitia

Longius fugata.

2. Ave, quae progrederis

Fulgens ut aurora,
Toti mundo nasceris

Clara et decora,
Dele mei pauperis

Culpas absque mora,
Ut coniungar superis,

Pro me supplex ora.

3. Ave, nata saeculo

Quae es ad salutem,
Praebens omni populo

Viam ad virtutem,
Da, ne culpae pabulo

Me a Deo mutem,
Sed cum suo poculo

Satanam confutem.

4. Ave, virgo regia

De tribu exorta,
Quae es vitae nuntia

Et salutis porta,
Ne per facta spuria

Vincar, me supporta,
Propter natalitia

Tua me conforta.

5. Ave, Dei civitas,

Virgo generosa,
Tua est nativitas

Mundo fructuosa,
Omnis per te vanitas

Mihi sit exosa,
Induat me claritas

Caeli gaudiosa.