15. In Annuntiatione BMV.

1. Ave, quae praeordinata

Eras ante saecula,
In multis praefigurata,

Virgo sine macula,
Ora, ne mea peccata

Gignant in me iacula,
Sed haec prece dele grata,

Clemens o iuvencula.

2. Ave, virgo, tibi pridem

Missum verbum suscipe;
Quid moraris? praebe fidem,

Dei natum concipe
Et reforma me eidem

Pacis unctum adipe
Pauperemque tuam quidem

Sub tutelam recipe.

3. Ave, virgo dulcis, pia,

O felix concipiens,
Sola mea spes, Maria,

Fovens et reficiens,
Non te vertas a me, quia

Ad te clamo sitiens,
Ne lapsus iacens in via

Peream deficiens.

i. Ave, quae es Deo digna
Fieri hospitium,
Placa mihi, o benigna,
Dulcem tuum filium,
Angelo bono consigna
Me, o vallis lilium,
Ne subvertat me maligna
Fraus meorum hostium.

5. Ave, virgo, mater Christi,

Quae divino opere
Pia fide concepisti

Iesum sine Venere,
In morte me iuva tristi

Tuae precis munere,
Da fructum, quem genuisti,

Me in caelis capere.