5. De sancto Bartholomaeo.

In 1. Vesperis

Antiphonae.

1. Gaude, mater ecclesia,
Nam Bartholomaei
Celebramus sollemnia,
Praeelecti Dei.

2. Mittitur in Indiam
Summi verna regis,
Praedicet ut gratiam
Ibi novae legis.

3. Mutescunt simulacra
Eius ad ingressum,
Dirigunt ad lavacra
Christi Indi gressum.

4. Linguae suae aratro
Aegras sanat mentes,
Indorum de barathro
Multas salvans gentes.

5. Aegro curam populo
Confert sospitatis
Eique incredulo
Fidem trinitatis.

R. Quanto plus deprimitur,
Cedrus plus erigitur
Motu naturali,
Modo quidem taIi
Quem torquet diabolus,
Plus floret apostolus
Omnis expers mali.

V. Fustigatus caeditur
Et pelle exuitur
Ordine brutali.

Ad Magnificat.

1. Iesu, dulcis Domine,
Tam sancti oramine
Solvens a ligamine

Multorum errorum,
Nos tua duc plasmata
Diva ad agalmata,
Colamus ut sabbata

Tecum sabbatorum.

In 1. Nocturno.

Antiphonae.

1. Exsultat viriliter

Sicut gigas, Christe,
Ad currendam iugiter
Viam iustam iste.

2. Calcantem miseriae
Mundi huius lutum
Caelis dedit hodie
Dominus virtutum.

3. Principum consilia
Deus reprobavit,
Horum quando studia
Per hunc confutavit.

4. Cordis iste vocibus
Ad Deum clamavit,
Et de tribulantibus
Eum liberavit.

5. Principem constituit

Super omnem mundum
Deus, sicut voluit,

Sanctum istum mundum.

6. Deo nostro psallite,
Psallite gaudenter,
Cum hoc sancto psallite
Cuncti sapienter.

Responsoria.

1. Bartholomaeus beatus
Vexillo crucis armatus

Indiam ingreditur,
Daemones mox obmutescunt,
Hoc Indi viso stupescunt,

Nova laus attollitur;
V. Signa et prodigia

Cumulantur

Et novantur
Dei mirabilia.

2. Habebat eximiam
Vesanam rex filiam

Mirae speciei,
Quam sanam Polimio
Regi a daemonio

Reddidit vir Dei;
V. Nova surgunt gaudia,

Plebs miratur,

Gratulatur
Rex sanata filia.

3. Nobili quidem thesauro,
Argento, gemmis et auro

Honorandus quaeritur,
Quaeritur nec reperitur,
Quia, ubi sit, nescitur,

Quaerens omnis fallitur.
V. Perplures electum

Sollerter ex milibus

Votis non imparibus
Requirunt dilectum.

4. Adest mane clanculo
Sanctus in cubiculo

Solus soli regi;
Quare, inquit, talia
Mihi das, contraria

Quae sunt Dei legi.
V. Qui terrena sapiunt,

Ista quaerunt,

Sed non erunt
Mea, quae decipiunt.

In 2. Nocturno.
Antiphonae.

1. Huius tui, Domine,
Ob preces amici
Turris sis a turbine
Nobis inimici.

2. In Deo laudabitur
Digne iste iustus,
Laudum decorabitur
Floribus venustus.

3. Beatus est, Domine,
Hic, quem elegisti,
Quem in tuo sanguine
Tibi conscripsisti,

4. Peccatorum cornua,
Deus, confregisti,
Quos virtute strenua
Huius prostravisti.

5. Nuntiat iustitiam
Dominantis caeli
Viam dans ad patriam
Populo fideli.

6. Dei testimonia

Quia custodivit,
Gaudia caelestia
Laetus introivit.

Responsoria.

1. Legem evangelicam
Fidemque catholicam

Os Bartholomaei
Principi proposuit
Modum et exposuit

Incarnati Dei,
V. Rex ab idolatria

Ut recedat,

Deo credat,
Qui creavit omnia.

2. Pontifex cum subdolo
Libas libat idolo,

Daemon vocem dabat:

Cessate, o miseri,
Ne vos ignis inferi

Sicut me invadat ;
V. Ligat infeliciter

Angelus me Dei,
Confixerunt turpiter

Quem cruci Iudaei.

8. Daemon frangit statuam,
Gentem per quam fatuam

Morbo dementavit,
Sua fracta propere
Reliquas diruere

Statuas hiavit.
V. Idolis gentilitas

Cum libavit,

Cruciavit
Magis hanc infirmitas.

4. Oculis daemonium
Dei servus omnium

Pernox praesentavit:
Ecce, inquit, comminus
Vester astat dominus,

Qui vos fascinavit ;
V. In desertum pervicax

Fugat brutum

Tam versutum,
Sit ut ad nil efficax.

In 3. Nocturno.
Ad Cantica.

A. Cantica laetitiae

Meritis praecelsis
Vir mirandae gratiae
Psallit in excelsis.

Responsoria.

1. Opere mirifico,
Precatu salvifico

Tunc Bartholomaeus
Sospitati credulum
Dat aegrotum populum,

Laudaturque Deus;

V. Rex cum omni populo
Christi quidem
Sumit fidem
Hoc viso miraculo.

2. Iacto diademate

Sancto doctus pneumate

Rex Bartholomaeum
Corde totus credulo
Aemulatur sedulo

Non relinquens eum;
V. Vitae quaerens bravium

Diadema

Calcat, schema
Flocci pendit regium.

3. Regis frater dyscolus,
Ut assit apostolus,

Iubet dicens sibi:
Cur fallendi vinculo
Perversum cum populo

Subdis regem tibi?
V. Sanctus ait subito:

Non perverti,

Sed converti
Verbi Dei merito.

4. Dire valde fustigatur
Et vivus excoriatur

Omni carens vitio
Tiro Dei gloriosus,
Martyr quoque pretiosus,

Caeli dignus solio;
V. Gaudiosus civium

Mira palma

Ad agalma
Transmigrat caelestium.

In Laudibus.

Super Psalmos.

A. De locis diabolus
Cedit orientis,
Adest dum apostolus
Virtutum augmentis.

Ad Benedictus.

A. Benedictus, Domine,

Es, Indos longinquos
In tuo qui nomine

Fecisti propinquos,
Populum tam dyscolum
Tuum per apostolum

Ad salutem vehis,
Cuius patrociniis
Caeli nos collegiis

Iunge iubilaeis.

Per Horas.
Ad Primam.

A. Primum regnum gloriae
Prudenter quaesivit,
Gaudenter hoc hodie
Felix introivit.

Ad Tertiam.

A. Victimandus tacuit
Vir tropaei magni
Et os non aperuit
Ritu mitis agni.

Ad Sextam.

A. Privatus exuviis
Agnus sine felle
Aeternis pro praemiis
Pellem dat pro pelle.

Ad Nonam.

A. Maximum congeritur
Gaudium in caelis,
Cum comes adicitur
Illis tam fidelis.

In 2. Vesperis.
Antiphonae.

1. Gaude, florens India,
Felix ac beata,
Tanti per insignia
Sancti decorata.

2. Effugat diabolum

Deus plenum sorde
Suum per apostolum
Ab Indorum corde.

3. Aegrotis remedia
Praestans potiora
Cunctis beneficia
Donat largiora.

4. Congregat in horrea
Omnia cernentis
Multos iacta palea
Fructus multae gentis.

5. Collaudant victoriam
Huius militantis,
Mirantur praesentiam
Cuius triumphantis.

Ad Magnificat.

A. Magnificemus hominum
Redemptorem et dominum

Vincentem in ligno,
Bartholomaei iugibus
Absolvat interventibus

Ut nos a maligno.