69. De s. Michaele et Angelis.

1. Ave, Michael beate,

Qui es Dei nuntius,
Mihi cum benignitate

Subveni propitius,
Labem mentis inquinatae

Meae dele mitius,
Formam vitae Deo gratae

Da mihi velocius.

2. Ave, Dei fortitudo,

Gabriel sanctissime,
Omnis per te turpitudo

Sit a me longissime,
Et sit mihi claritudo

Famae decentissimae
Atque boni plenitudo

Sufficientissimae.

3. Ave, Dei medicina,

Raphael amabilis,
Eleva me de sentina

Mundi miserabilis,
Non me torreat coquina

Inferni horribilis,
In loco pacis reclina

Me interminabilis.

4. Ave, angele, donatus

Mihi singulariter,
Vivam per te confortatus

In bono feliciter,
A nefandis separatus

Omnibus finaliter
In caelisque meus status

Sit felix perenniter.

5. Ave, omnis beatorum

O turba spirituum,
Favete mihi vestrorum

Subventu precatuum,
Particeps vitiosorum

Ne fiam reatuum,
Sed vobiscum supernorum

Sim conviva fructuum.