13. De ss. Simone et Iuda.

1. Firmamentum ecclesiae
Nova produxit sidera,
Fontem miremur gratiae
Talia dantem opera.

2. Iudas Mesopotamiam
Pontumque Deo dedicat,
Et per Aegypti patriam
Simon salutem praedicat.

3. Errore adhuc perfidam
Pariter suum dirigunt
Gressum ambo in Persidam,
Quam vitae verbis erigunt.

4. Principem Babylonicum
Baptismi mundant gratia
Populumque barbaricum,
Ceu quadraginta milia.

5. Idolorum pontifices
Tota permota patria
Virtutum hos opifices
Lucis torquent angustia.

6. Tales duces et praesules,
Talia luminaria,
Nos consolentur exsules
Hac in mundi miseria,

7. Beatus ut a sarcina
Liberati feliciter
Caeli carpamus limina
Cum angelis perenniter.

8. Honor patri ingenito
Eiusque unigenito,
Sit semper laus et inclito
Spiritui paraclito.