2. De sancto Achatio.

In 1. Vesperis.

Antiphonae.

1. Hodie ecclesia

Collaudans cum gaudio
Dedit decem milia
David, Dei filio.

2. Bethlehem propaginem
Istam generosam
Genuit, per sanguinem
Deo gloriosam.

3. Candidant in sanguine
Stolas suas agni
Martyres certamine
Et tropaeo magni.

4. Labiorum vitulos

Christo obtulerunt,

Portantes manipulos
Palmas acceperunt.

R. Decachordum psalterium
Martyrum decem milium
Iubilans canit caelicum
Deo in caelis canticum.
V. Chorus iste gloria
Fulgens et honore
Fuso caeli gaudia
Possidet cruore.

Ad Magnificat.

A. Ararath, cum gloria
Digne gratularis,
Tot quia praesentia
Martyrum ditaris,
Gloriaris merito
Felix hoc deposito,
Mons o salutaris.

Ad Matutinum.
Invitatorium.

Iubilemus gloriae

Regi, vero Deo,
Qui coronat hodie

Martyres tropaeo.

In 1. Nocturno.

Antiphonae.

1. Samson novus, princeps fortis,
Revebendo spolia
Martyrum de fauce mortis
Decem vexit milia.

2. Res mirandae, res novellae,
Plenae Dei opere,
De lato consurgunt stellae,
Violae de pulvere.

3. Qui de terra fecit caelum,
Angelum de homine,
Sanctos hos per crucis prelum
Novo signat nomine.

4. Martyrum te candidatus
Collaudat exercitus,
Iesu, tuus cum beatus
Debriat hos spiritus.

5. Pro iugo das libertatem
His, pro lege gratiam,
Pro figura veritatem
Et pro via patriam.

6. Triumphantes hos athletas
Tuo lotos sanguine
Ad vitae conducis metas,
Iesu, dulcis Domine.

Responsoria.

1. Romanae primicerius
Legionis, Achatius,
Augustis fugientibus
Stat et obstat milibus
Tantum cum novenis

Hostibus instantibus
Milibus centenis ;
V. Sensus fugit, cor haesitat,
Vigor et virtus cespitat.

2. Tantis in angustiis
Victimant pro hostiis

Hoedum suis deis,
Sperantes propitium
Sibi patrocinium

Fieri ab eis;
V. Cor plus horum tabuit

Maiori defectu,
Optato cum caruit

Affectus effectu.

3. Milites cum deficerent
Desperatique fugerent
Tristes et imbelles,
Angelus: Christo credite,
Dixit, et ita caedite
Hostes et rebelles ;
V. Credentes vincunt, Domine,
Hostes in tuo nomine.

4. Veri virtus Gedeonis
Gentem fugat aquilonis
Accensis lampadibus,
Istam Dominus cohortem
Vexit fidei ad sortem
Fugatis erroribus ;
V. Tantae rei mutatio
Dextrae excelsi actio.

In 2. Nocturno.
Antiphonae.

1. Aquae vini induunt
Congrue naturam,
Idolorum respuunt
Dum isti culturam.

2. Martyrum tot milia
Passibus virtutis
Currunt cum laetitia
Ad fontem salutis.

3. Martyres ad fortia
Bella animati
Felici victoria
Gaudent decorati.

4. Blandimenta noxia
Isti contemnentes
Supernorum gaudia
Merentur gaudentes.

5. Carnis per interitum
Hi quando plectuntur,
Beatorum meritum
Digne consequuntur.

6. Deus stola gloriae
Martyres decorat,
Pascit in meridie,
Praemiis coronat.

Responsoria.

1. Regina aromata
Austri et charismata
Defert Salem regi,
Dum mater ecclesia
Martyrum tot milia
Christi subdit legi,
V. Quibus Christus vita vitam
Sua morte dat cupitam.

2. Sol caelestis patriae
Lumen spargens gratiae

Aureos in clipeos,
Dominus hos milites
Fide fecit divites

Et cruore roseos.
V. Fortitudo gentium

Vere dissipatur,
Vertex per hos montium

Dum illuminatur.

3. Quinque reges gentium
Substrati sub pedibus
Gemunt Hebraeorum,
Gaudent Euphratensium
Victis isti regibus
Et Gadarenorum ;
V. Illos crux praedonum punit,
Hos Christo crux Christi unit.

4. Opere laudabiles,
Merito mirabiles

Isti bellatores,
Non armis sed animis
Dantes lumen proximis

Redduntur victores ;
V. In vaginam gladium

Suum ut miserunt,
Ad caeleste bravium

Fide pervenerunt.

In 3. Nocturno.
Ad Cantica.

A. Augetur laetitia

In regno caelorum
Istorum praesentia
Martyrum sanctorum.

Responsoria.

1. Milites principibus
Pro Christo ferocibus

Quando praesentantur,
Singuli in singulis
Suspendi patibulis
Crucis iudicantur;
V. Gemmae dantur suibus,
Oves lupis, canibus,
Heu, sancta iactantur.

2. Sancti cum lapidabantur,
In ora revertebantur
Saxa lapidantium,
Sic, dum virgis caedebantur,
Arefactae siccabantur
Manus flagellantium ;
V. Illuc digne revertuntur
Fluctus, unde oriuntur.

3. Ista vasa aurea
In fornace ferrea

Plenius probata
Delata sunt omnia
Ad poli convivia,
Ubi sine termino
Obtinent eum Domino

Gaudia optata;

V. Horum spes est immortalis,
Nam habent Dei sub alis
Praemia beata.

4. Mari mersis hostibus

Fideles laetantur
Signatisque postibus

Sanguine salvantur,
Reddita primaria
Stola sic de alia

Stola securantur;
V. Martyres hi nobiles,
Caritate stabiles,

Angelis aequantur.

In Laudibus.

Super Psalmos.

A. Martyres de clibano
Mundi sumpti tympano
Laudant et in organo
Dominum de Libano.

Ad Benedictus.

A. Benedictus es, Domine,
Tu fidei qui lumine
Sanctos hos suo sanguine

Tibi consecrasti,
Ipsorum contuberniis
Caelicolas sollemniis,
Christicolas suffragiis

Abunde ditasti.

Per Horas.

Ad Primam.

A. Austri dulcis flamina
Germina fecundant,
Martyrum tot agmina
Caelestes secundant.

Ad Tertiam.

A. Gedeonis vellera

Rore infunduntur,
Martyres sic munera
Vitae sortiuntur.

Ad Sextam.

A. Morti se impendunt isti
Pro amore Iesu Christi,
Plus quam ad convivia
Currunt ad supplicia.

Ad Nonam.

A. Ampliavit viscera
Christus pietatis
Pro laeva sub dextera
Sanctis transmutatis.

In 2. Vesperis.

Antiphonae.

1. Singuli in crucibus
Martyres adfixi
Fidei sub legibus
Stant in finem fixi.

2. Decem mutatoria
Missa Helisaeo
Signant, quod ecclesia
Mittit istos Deo.

3. Beatis coniubilant
Astra matutina,
Qui cruore rutilant
Hora vespertina.

4. Hi per patientiam,

Qua mundum vicerunt,
Supernorum gloriam
Laeti intraverunt.

Ad Magnificat.

A. Martyrum tot cunei
Passione rosei
Non tulela clipei
Sed virtute fidei

In Christo fundantur,
In caelesti curia
Vera in laetitia
Honore et gloria
Cum stola primaria

Merito ditantur.

A. Martyres vi rapiunt
Caelum Deo digni,
Sola Dei sapiunt
Tropaeo insigni.

A. Cumulantur gaudia
Per tot natalitia
Martyrum cum gloria
In caelesti patria.