XLI a. CHRISTANUS CAMPOLILENSIS.
7. De sancto Colomanno. Ad Completorium.
12. De sanctissimo Sacramento.
19. De beata Maria V. Super Ave Maria.
51. De s. Iohanne Evangelista.
69. De s. Michaele et Angelis.
1. Ave, Simon venerande,
Flos oboedientiae,
Qui viam vitae amandae
Doces verbo gratiae,
Super me sinum expande
Divinae clementiae,
Ne subsannent me nefandae
Infernales furiae.
2. Ave, qui ad nationes
Es profectus efferas,
Ut his consolationes
Verae vitae conferas,
Precor, ut confusiones
Mei cordis auferas
Et ad caeli mansiones
Me post mortem deferas.
3. Ave, verbum salutare
Proponens Aegyptiis,
Multos abrenuntiare
Multis doces vitiis ;
Cor meum iam fac cessare
A concupiscentiis,
Ut se possit adaptare
Divinis solaciis.
4. Ave, pangens duci pacem
Regis Babyloniae,
A me averte fugacem
Mundanae laetitiae
Spem et hostem pervicacem
Divinae militiae,
Hunc ut vincam contumacem,
Da, zelo iustitiae.
5. Ave, quia absolutus
Carnis ab ergastulo
Ad caelos festinas tutus
Sine offendiculo,
Per te, precor, ut adiutus
Cum caelesti populo
Vivam virtute indutus
In futuro saeculo.