XLI a. CHRISTANUS CAMPOLILENSIS.
7. De sancto Colomanno. Ad Completorium.
12. De sanctissimo Sacramento.
19. De beata Maria V. Super Ave Maria.
51. De s. Iohanne Evangelista.
69. De s. Michaele et Angelis.
1. Solarem radium luce purissimum
Terrae dat gremium mundo gratissimum,
Gaudium exsulum, coronam praesulum,
Udalricum antistitem.
2. A pueritia hic innocentiam
Felici gratia tenet innoxiam,
Instans ieiuniis piisque studiis
Carnis elisit fomitem.
3. Prudenter laqueum devitat scelerum,
Virtutum clipeum contra pestiferum
Satanam protulit et ita propulit
Diras eius insidias.
4. Morum charismate notos laetificat,
Famae aromate omnes aedificat,
Verbis gratificat, ope fortificat
Contra cunctas molestias.
5. Marthae obsequia die fideliter,
Mariae studia nocte viriliter
Agebat pontifex, ne mille-artifex
Plaga mortis hunc feriat.
6. Non terrae gremio talentum creditum
Neque sudario velat absconditum,
Verum hoc variis dat nummulariis,
Multum ut lucrum faciat.
7. Superna sitiens Euge dominicum
Audit ingrediens conventum caelicum,
Stola primaria fultus et gloria
Cum gaudiorum foenore.
8. Patri ingenito eiusque filio,
Pneumati inclito sit iubilatio,
Honor, victoria, decus, laus, gloria
Nunc et in omni tempore.