1. De sancta Agnete.

la. Gaude, Sion, laetabunda,
Virgo felix et fecunda,
O mater ecclesia,

1 b. Gaude, caelum, terra plaude,
Festum, ecce, plenum laude
De Agnae victoria.

2 a. Gaude ergo, mente cana,
Vultu decens, fide sana,
Agna agni filia.

2 b. Gaude, dulcis sponsa Christi,
Mundi faces quae vicisti,
Felici industria.

3 a. Gaude, dum de scholis redis,
Nuptiis assensum foedis
Ut des, fit instantia.

3 b. Gaude, tu praefecti natum
Contemnis suumque datum
Salubri constantia.

4 a. Gaude, proiecto mortali
Sponso nubis immortali,
Damnas transitoria.

4b. Gaude, veste denudata
Spernens deos es ornata
Plus crinis decentia.

5 a. Gaude, dum prostibularis,
Non foedans tactu maris
Nec carnis miseria.

5 b. Gaude, stola candes tota,
Domus turpis fit devota
Angeli praesentia.

6 a. Gaude, quem libido caecat,
Sponsum tuum fallax necat
Daemonis nequitia.

6 b. Gaude, per te vitae datur
Tuus sponsus et testatur
Dei mirabilia.

7 a. Gaude, in flammam proiecta
Laudas Deum, stans erecta,
Nec sentis incendia.

7 b. Gaude, dum transgutturaris,
Agna, agno complantaris
Inter caeli lilia.

8 a. Gaude, sic perdendo mortem
Transis in vivorum sortem
De mundi malitia.

8 b. Gaude, felix et beata,
Nos duc ad diu optata
Caelorum palatia.