2. De Patre.

1. Ave, pater omnium

Causa causatorum,
Tu, cum promptuarium

Sis universorum,
Morum mihi studium

Confer honestorum,
Ne constringar hostium

Loris funestorum.

2. Ave, pater caelica

Spargens cunctis dona,
Tu quidem mirifica

Iustis es corona,
Me ergo fortifica

Omnia ad bona
Sic, ut non ad toxica

Sit mens mea prona.

3. Ave, pater luminum,

O Deus deorum,
Te testatur Dominum

Suum vox cunctorum,
Exaudi precaminum

Clamorem meorum,
Ut fiam solaminum

Particeps tuorum.

4. Ave. pater, cordium

Pax iucundativa,
Es ad te clamantium

Totus salus viva,
Mihi patrocinium

De caelis deriva,
Ut tela laedentium

Me spernam nociva.

5. Ave, pater, gaudia

Qui das gaudiorum
Super mella dulcia

In regno caelorum,
Fugans a me noxia

Omnium malorum
Concivem in gloria

Me fac angelorum.