83. De sancta Ursnla.

1. Ave, virgo Ursula

Generis regalis,
Non te carnis macula

Fuscat aliqualis,
In te tabernacula

Princeps illocalis
Fixit praebens oscula

Sponsi spiritalis.

2. Ave, primiceria,

Victoriosarum
Te undena milia

Ornant puellarum,
Tibi per martyria

Tot quidem sanctarum
Frequentatur gloria

Per orbem terrarum.

3. Ave, mundi dulcia

Quae aspernabaris,
Iuste tympanistria

Agni nuncuparis,
Christo multa milia

Martyrum lucraris,
Cum quibus in curia

Caeli gloriaris.

4. Ave, ecce, sceleris

Me laedit ligamen,
Cuius quoque ponderis

Opprimit gravamen,
Praecurre prae ceteris

Ad meum iuvamen,
Contra tela veteris

Hostis sis tutamen.

5. Ave, his temporibus

Quae surgis ut stella,
Occidentis partibus

Patrona novella,
Tuis piis precibus

Mortis fuga fella,
Me iunge caelestibus,

O dulcis puella.