34. De sancto Benedicto.

1. Ave, pastor et patrone,

Monachorum gloria,
Benedicte, pater bone,

Omni florens gratia,
Clipeum te pro me pone

Cuncta contra vitia
Mihi astans in agone,

Per te vincam omnia.

2. Ave, qui fallentis mundi

Conculcasti dulcia,
Non me mundi furibundi

Superet malitia,
Nec permittas me confundi

Satanae versutia,
Sed, ut fiam cordis mundi,

Precum da instantia.

3. Ave, carnis blandimenta

Qui vicisti noxia,
Carnis iuva temptamenta

Vincere me spuria,
Tuae iam mihi praesenta

Virtutis auxilia,
Ut per tua fulcimenta

Vigeam in latria.

4. Ave, quia boni moris

In te ridet copia,
Vitae mihi purioris

Offer beneficia,
Fugere da cunctis horis

Omnis culpae devia,
Praesta, vas ut sim honoris

In caelesti patria.

5. Ave, quia vanitatis

Contempsisti otia,
Per te virtus pietatis

Mihi fiat socia,
Duc de faece foeditatis

Ad vitae negotia,
Tua prece cum beatis

Me Christo consocia.