73. De sancto Petro.

1. Ave, Petre o beate,

Princeps apostolice,
Columna inviolatae

Fidei catholicae,
Dulcis praedicator datae

Legis evangelicae,
Fac participem me gratae

Gratiae dominicae.

2. Ave, qui centurionem

Convertis Cornelium,
Stultam a me passionem

Pelle, fer auxilium
Mihi per orationem

Tuam, Dei filium
Placans caeli mansionem

Da post hoc exsilium.

3. Ave, qui aegrotos sanas

Umbra tui corporis,
Cogitationes vanas

Mei fuga pectoris
Actionesque insanas

Virosi facinoris,
Virtutes mihi da sanas

Dono tui roboris.

4. Ave, qui Thabitam mortis

Suscitas de carcere,
Contra nefas ut sim fortis,

Pio confer munere,
Mortis festina de portis

Me cito eripere,
Da in paradisi hortis

Deo laudes promere.

5. Ave, qui mortis maerorem

Vicisti praepropere
Spernens Caesarem Neronem

Sermone et opere,
Da vim, inferni draconem

Ut possim devincere,
Me tribus Iudae leonem

Fac in caelis cernere.