4. De Filio.

1. Iesu, ave, fax amoris,

Dulcis recordatio,
Melos auris, favus oris,

Cordis iubilatio,
Solamen mei maeroris,

Mea exsultatio,
Humani merces laboris

Tu, ad te confugio.

2. Eia, Iesu, nomen gratum,

Finis et principium,
Nomen sanctum et beatum,

Complens desiderium,
Medicamen delicatum

Dans salutis gaudium,
Finem bonum et optatum,

Palmae praesta bravium.

3. Salus mundi, praedo mortis,

Via, vita, veritas,
Princeps pacis, Deus fortis,

Iesu, mentis sanitas,
Inferni ne claudar portis,

Mihi desit foeditas,
Tuae consors ut sim sortis,

Omnis assit puritas.

4. Vita mea, amor meus,

Dulcis et dulcissime,
Iesu, fili Dei, Deus,

Frater amantissime,
Ad te clamo ego reus,

Subveni citissime,
Ne me vincat Iebusaeus

Impugnans nequissime.

5. Salvans amor, Iesu care,

Dei sapientia,
Non permittas degustare

Mortis me supplicia,
Veni et noli tardare,

Mea spes et gloria,
Deduc me trans mundi mare

Ad caeli palatia.