5. De sancto Colomanno

Ad Vesperas.

1. Novelli sideris exorto iubare

Mundus cum superis festo non impare
Promunt praeconia, nos enim gratia
Visit ex alto oriens.

2. Granum proicitur in terrae gremium,
Dans, quando moritur, fructum eximium,
Sic post martyrium odorem varium
Dat Colomannus moriens.

3. Ictus supplicii fortiter patiens,
Palmam martyrii ovans suscipiens,
Hinc beneficia mater ecclesia
Per eum plura suscipit.

4. Qui patientia tormenta superat,
Meriti gratia aegrotos reparat,
Effuso sanguine pro Christi nomine
Bravium viae arripit.

5. O martyr, semina culparum remove,
Virtutum germina in nobis promove,
Ut ita libere possimus currere
In mandatorum semita.

6. Implora precibus iugibus Dominum,
Nobis pauperibus amorem geminum
Libens ut tribuat atque nos instruat
Reddere vota debita.

7. Nostraque inclitis describi nomina
Procura meritis in vitae pagina,
Ut poli solium post hoc exsilium
Capiamus feliciter.

8. Patri ingenito honor et gloria,
Sit unigenito salus, victoria
Benigno flumini sit, trino numini
Laus sit nunc et perenniter.