4. De sancta Anna.

In 1. Vesperis.

Antiphonae.

1. Gaudeat ecclesia
Annae de natali,
Trahentis exordia
De stirpe regali.

2. Viro iuncta socia
Nexu coniugali,
Boni tantum conscia,
Morbo carens mali.

3. Praeceptis legalibus
Tota intendebat
Nec ullis erratibus
Ab bis secedebat.

4. Extendit ad fortia
Felix ista manum,
Sic in innocentia
Mundum vicit vanum.

R. De spina Hebraica,
De stirpe Davidica,

Recens surgit rosa,
Mundo dans primordium,
Salutis exordium,

Anna generosa.
V. Mariam haec genuit,

Miserorum scutum,
Quia semper viruit

In donis virtutum.

Ad Magnificat.

A. Magnificent vigiles
Exaltantem humiles

Deum omnes gentes,
Ut Annae precatibus
A cunctis reatibus

Nostras mundet mentes.

Ad Matutinum.
Invitatorium.

In tam sacro sollemnio
Matris matris Dei

Adoremus in gaudio
Deum iubilaei.

In 1. No cturno.

Antiphonae.

1. Ex ore infantium

Deus laudem perficit,
Per Annae coniugium
Satanam cum deicit.

2. Hoc in sole posuit
Suum tabernaculum,
Salvare dum voluit
Suum Deus populum.

3. Deus, super maria

Qui terram fundavit,
Gratiam pro gratia
Annae cummulavit.

4. Prae suis consortibus
Oleo laetitiae
Hanc iunctam caelestibus
Deus unxit hodie.

5. Suum tabernaculum
Dominus sanctificat,
Annae cor cum lectulum
Sibi soli dedicat.

6. Magni regis civitas,
Anna laetabunda,
Omnibus sterilitas
Tua est fecunda.

Responsoria.

1. Novella lux exoritur

Fulgore grato rutilans,
In gaudium plebs tollitur
Novellas laudes iubilans ;
V. Ad Annae natalitia
Nova fulgent sollemnia.

2. Felici origine

Sacra de propagine

Anna sumpsit ortum,
Vita cuius inclita
Nobis atque merita

Vitae praestent portum;

V. O felix nativitas,
Qua paratur,
Quae speratur,
Aeterna felicitas.

3. Annos Anna pubertatis
Dignis currens cursibus
Tiro paris honestatis
Legis nubit ritibus;
V. Ioachim haec desponsata,
Purpurata et ditata
Floret aequis moribus.

4. Actus vitantes obscaenos
Caelibi coniugio
Annos simul per bis denos
Pio vivunt studio,
V. Ambo denique nobiles,
Sed ventris fructu steriles.

In 2. Nocturno.

Antiphonae.

1. Divina iustitia

De caelo prospexit,
Sorte multifaria

Quae Annam protexit.

2. Sanctis sunt in montibus
Annae fundamenta,
Quae semper virtutibus
Vivebat intenta.

3. Novum Deo canticum
Conemur cantare,
Ad carmen hanc caelicum
Dignanti vocare.

4. Lux iustis exoritur
Et rectis laetitia,
Cunctis enim nascitur
Anna, Dei gratia.

5. Dominus mirabilis
Fecit mirabilia,
Anna cum laudabilis
Surgit ad caelestia.

6. Domini terribile
Nomen et beatum
Tenuit cor nobile
Annae frequentatum.

Responsoria.

1. Rei suae substantiam
Devota consuetudine
Dant partitam trifariam
Vivi Dei pro nomine:
V. Partem dant egentibus,
Partem sacerdotibus,
Partem suis usibus.

2. Horum vita fuit grata
Deo et caelestibus,
In virtute solidata

Complacens hominibus,
V. Dei placet filio
Non indigne
Sed tam digne
Rosa iuncta lilio.

3. Vovent, ipsis si daretur
Nuptiarum praemium,
Ipsum quidem oiferretur
In Dei servitium ;
V. Hoc tribus sollemniis
Quaerunt sacrificiis
Et piis officiis.

4. Ioachim sacrificium
Ferens audit opprobrium

Infecunditatis
Et fugit et absconditur
Nec ad suos regreditur

Flos simplicitatis,
V. De cuius absentia

Quasi demens

Anna fremens
Maeret prae angustia.

In 3. Nocturno.
Ad Cantica.

A. Mundi decens orbita,
Gratulans laetare
Celebrando inclita
Festa Annae clarae.

Responsoria.

1. Angelus hos consolatur,
Eis dum vaticinatur
Nascituram filiam
Mundo dantem gratiam,
Angelis laetitiam,
Trinitati gloriam ;
V. Spargit ut sol radium,
Pariet haec filium
Vitae dantem bravium.

2. Angeli pollicitis
Mutuisque monitis

Dabant demum fidem,
Datis rationibus
Multis de sterilibus,

Nam nutabant pridem ;
V. Pactum post angelicum

Securantur,

Praestolantur
Partum tam magnificum.

3. Anna tandem filiam
Peperit eximiam,

Maeror terminatur,
Fugatur opprobrium,
Cumulatur gaudium,

Risus frequentatur.
V. O grata sterilitas,

Quam secundat

Et fecundat
Tantae prolis dignitas!

4. O felix commercium,
O caelebs coniugium

Ioachim et Annae,
Qui de stirpe regia
Nati plenam gratia

Gignunt arcam mannae!
V. Felices hi gemini,

Deo cari,

Mundo clari,
Nulli dati crimini!

In Laudibus.
Antiphonae.

1. Annam sacram induit
Dominus decore,
Semper enim viruit
In eius amore.

2. Omnis terra, mentibus
Deo iubilate
Et Annae virtutibus
Sanctis vos ornate.

3. Domini ut gloriam
Laeti videamus,
Vigiles ad latriam
Cum Anna vivamus.

4. Deo benedicere

Quia novit Anna,
Digna modo sumere
Est divinum manna.

5. Miris pro virtutibus
Annae tam fidelis
Iubilemus laudibus
Domino de caelis.

Ad Benedictus.

A. In domo ecclesiae
Sol refulsit gratiae,
Luce radiosa
Anna gratiosa;
Iesu, cuius inclitis
Precibus et meritis
Nos ex alto visita
Cuncta delens debita
Nostra criminosa.

Per Horas.

Ad Primam.

A. Laudibus tripudia

Coniungamus omnes
Annae natalitia
Colentes insomnes.

Ad Tertiam.

A. Dives Anna moribus
Stirpe et virtute
Sit et dives precibus
Pro nostra salute.

Ad Sextam.

A. Virtutum monilibus
Anna decorata
Iungitur caelestibus
Deo semper grata.

Ad Nonam.

A. Prece tuae dulcis avae,
Annae beatissimae,
Libera nos omni a vae,
Iesu benignissime.

In 2. Vesperis.
Antiphonae.

1. Annua sollemnia
Annae celebramus,
Omnem ut miseriam
Per hanc evadamus.

2. Fructum fert tricesimum,
Divinum thesaurum,
Excedentem plurimum
Argentum et aurum.

3. Floruit virtutibus
Et decore morum
Per viam in omnibus
Currens mandatorum.

4. Nulli parens crimini,
Anna o benigna,
Mater matris Domini
Fieri es digna.

Ad Magnificat.

A. Abraham in semine
Pepegisti, Domine,

Nos omnes salvare;
Annae ergo precibus,
Ut iurasti patribus,

Nostri memorare.