2. De sancto Altmanno.

1 a. Gaude, caeli ierarchia,
Mundi gaude monarchia
De Altmanni gloria,

1b. Omne discedat molestum,
Ad sacrum Altmanni festum
Nulla desint gaudia.

2 a. Altmanne sacer et clare,
Caelum clamat, terra, mare
Te dignum antistitem;

2 b. Dei gregis tu dux aequus,
Mundi lampas, caeli decus,
Vitae tenes tramitem.

3 a. Mira dares caritate,
Et in tanta claritate
Omnis stupet oculus,

3 b. Admirandum sanctitate
Digna te sollemnitate
Laudis vulgat titulus.

4 a. Sapiens ut architectus

Tibi Christum spe profectas
Fundamentum dedicas,

4 b. Gemmas, aurum et argentum

Tale super fundamentum

Prudenter aedificas.

5 a. Summis scalam Iacob horis

Ascensu tangis amoris

Theoriae fructibus

5 b. Nec ex ipsis captas laudes,

Belial nam fallis fraudes

Aequitatis passibus.

6 a. Die cum Martha laboras,
Nocte cum Maria oras
Uniens te superis,

6 b. Dulci Rachelis amplexu
Frui volens Liae nexu
Praepediris operis.

7 a. Sic de lacrimarum valle
Gratiarum scandis calle
Ad caeli fastigia,

7 b. Ubi plus quam verni flores
Aeterno cum fructu flores
Inter vitae lilia.

8 a. Eia, Iesu Christe, tibi
Libro vitae da conscribi
Nos Altmanni precibus

8 b. Tuae sortis coheredes,
Tecum ut carpamus sedes
Cum electis omnibus.