5. De sancta Caecilia.

1 a. Gaudeat ecclesia,
Tua natalitia

Celebrantur hodie,

1b. Felix o Caecilia,
Virtute egregia

Sponsa regis gloriae.

2 a. Ieiunabas biduo
Pariter et triduo
Vitae tuae tempore,

2 b. Devotum per studium
Christi evangelium
Gerebas in pectore.

3 a. Diebus ac noctibus
Non cessas ab actibus
Divini colloquii,

3 b. Corpus tuum pluribus
Tu asperitatibus
Domasti cilicii.

4 a. Fidei consortio
Iungis cum Tiburtio
Tuum sponsum libere,

4 b. Iudicem Almachium
Dolosum et impium
Superasti prospere.

5 a. Cum palma martyrii
Caeli fores atrii

Laetanter ingrederis,

5 b. Tuis ubi dulcibus
In aevum precatibus
Uniamur superis.