9. De sancto Georgio.

1 a. Caelum, terra, mare, gaude,
Arbor, herba, gemma, plaude,
Spirans omne, vaca laude
Salubri tripudio.

1b. In Georgii natali

Omni spreto fonte mali
Glorianter spiritali
Iucundemur gaudio.

2 a. Annis quidem iuventutis
Moribus vernans virtutis
Volat ad fora salutis
Voce, corde, opere.

2 b. Corde tandem iubilaeo
Fuso sanguine pro Deo
Regnat et vivit cum eo
Nunc et omni tempore.

3 a. Dacianum expugnavit
Satanamque fide stravit,
Contra cuncta triumphavit,
Dignus vitae gloria.

3 b. Sanctum ergo veneremur
Tantum omnes et miremur,
Actus eius imitemur
Felici constantia.