10. De sancto Leonhardo.

la. Glorietur orbis totus,

Leonardus, Deo notus,

Iam regnat in gloria.

1b. Omne discedat molestum

Et ad Leonardi festum

Nulla desint gaudia.

2 a. Leonarde, te, o clare,

Caelum clamat, terra, mare

Christi dignum militem.

2 b. Dei plebis tu dux aequus,

Mundi lampas, caeli decus,

Vitae tenens tramitem.

3 a. Mira clares caritate

Et in tanta claritate

Omnis stupet oculus.

3 b. Admirandum sanctitate

Digna te sollemnitate

Laudis vulgat titulus.

4 a. Sapiens ut architectus

Tibi Christum spe profectus

Fundamentum dedicas.

4 b. Gemmas, aurum et argentum

Tale super fundamentum

Prudenter aedificas.

5 a. Summis scalam Iacob horis

Ascensu tangis amoris

Theoriae fructibus.

5 b. Nec ab ipsis captas laudes,

Belial nam fallis fraudes

Aequitatis passibus.

6 a. Die cum Martha laboras,

Nocte cum Maria oras

Uniens te superis.

6 b. Dulci Rachelis amplexu

Frui volens Liae nexu

Praepediris operis.

7 a. Sic de lacrimarum valle

Gratiarum scandis calle

Ad caeli fastigia,

7 b. Ubi plus quam verni flores

Aeterno cum fructu flores

Inter vitae lilia.

8 a. Eia nos, o Christe, tibi

Libro vitae da conscribi

Leonardi precibus,

8 b. Tuae sortis coheredes

Tecum ut carpamus sedes

Cum electis omnibus.