11. De sancta Martha.

1 a. In caelesti ierarchia

Mulcens pangit symphonia
Marthae natalitium,

1b. Labentis mundi nos horis
Fibris et suum canoris
Promamus praeconium.

2 a. Martha, dulcis et beata,
Regia de tribu nata,
Omni laude dignior,

2 b. Vultu clares, lingua flores,
Sponsi curris post odores
Aquilis velocior.

3 a. Paradoxe per decorem
Mentis tuum ad amorem
Trahis Deum dulciter.

3 b. Extendis et non in vanum
Largam universis manum
Pie et feliciter.

4 a. O quam felix et insignis,
Quae tam miris fulges signis,
Insignit ut ratio;

4 b. Iesum, mundi salvatorem,
Tuum quidem dilectorem,
Colligis hospitio.

5 a. Paganismi nexu captos
Legi Christi reddis aptos
Verbi Dei pabulo ;

5 b. Lazarus quatriduanus,
Ut vis, suscitatur sanus,
Mortis ab ergastulo.

6 a. Saevum exsufflas draconem
Crucis sanctae per mucronem
Gaudium dans omnibus;

6 b. Animam tuae sororis
De loco vides maeroris
Caeli iungi civibus.

7 a. Iuvenem mersum de nece
Pia suscitasti prece
Virtute inolita.

7 b. Ferum Clodoveum regem
Fidei ducis ad legem
Sospitate reddita.

8 a. Laudes, Iesu, damus tibi,
Prece Marthae iube scribi
Nos in vitae pagina,

8 b. Vitatis ut poenis mortis
Canamus Sion in portis
Angelorum carmina.