Acta Apostolicae Sedis - Commentarium Officiale488

BARCINONENSIS

Beatificationis seu Declarationis Martyrii Servorum Dei Iacobi Puig Mirosa et XIX

Sociorum, e Congregatione Filiorum Sacrae Familiae Iesu, Mariae et Ioseph

({ 1936-1937)

DECRETUM SUPER MARTYRIO

«Hi sunt qui veniunt de tribulatione magna et laverunt stolas suas et

dealbaverunt eas in sanguine Agni. Ideo sunt ante thronum Dei et serviunt

ei die ac nocte in templo eius » (Ap 7, 14-15).

Haec Sancti Ioannis apostoli et evangelistae verba vitam et mortem

Servorum Dei Iacobi Puig Mirosa et XIX Sociorum e Congregatione Filiorum

Sacrae Familiae Iesu, Mariae et Ioseph collustrant, quos omnes, persecu-

tionem pro fide patientes, summum eorundem amorem et fidelitatem erga

Christum et Ecclesiam neque tormenta neque pavor ullus vicerunt. Omnes

vero in adiunctis immani odio fidei recussis degerunt. Nam, vigesimi saeculi

decade quarta, Hispaniam efferatum vastaverunt bellum civile ac dira

persecutio contra religionem, quae omnem publicum cultum praepedivit et

Ecclesiam ipsam hispanicam legibus facinoribusque feris adusque abolere

contendit.

Quorum Christi testium apostolatus praecipuus provectus fuit pietatis

erga Sacram Familiam a Nazareth, familiarum christianarum sollicitudo

per catholicam puerorum iuvenumque disciplinam et institutionem, necnon

ministerii sacerdotalis exercitium; frater unus coadiutor, insuper, animo et

opibus etiam eadem ad informationis munera incumbebat, tres alumni erant

qui theologicae suae institutioni perficiendae vacabant et iuvenis laicus in

Foederatione Iuvenum Christianorum Catalaunorum versabatur iuvenibus

suae aetatis operam impendens.

Locis et diebusque diversis quisque interemptus est:

I. In civitate Blanes, prope Gerundam. Primitiae victimarum, quae

Collegio Sanctae Mariae de Blanes coniungebantur, die 30 mensis Iulii anno

1936 ceciderunt, scilicet:

1. Pater Iacobus Puig Mirosa, qui in civitate Terrassa, olim Egara, prope

Barcinonem die 3 mensis Iunii anno 1908 natus, professionem religiosam