Acta Apostolicae Sedis - Commentarium Officiale502

BOMBAYENSIS

Beatificationis et Canonizationis Servae Dei Ferdinandae Riva, Sororis professae

ex Instituto Filiarum a Caritate (1920-1956)

DECRETUM SUPER VIRTUTIBUS

« Ecce ego: mitte me! ».

Haec sollicitae Isaias propheta respondet quaestioni, qua summum divi-

num suum caritatis pro creaturarum bono salutisque Deus revelat studium:

«Quem mittam? Et quis ibit nobis? » (Is 6, 8).

Quod alacre Isaiae responsum ad spiritualem indolem dignoscendam

aptissimum videtur Servae Dei Ferdinandae Riva, Sororis professae ex

Institute Filiarum a Caritate, quae, cum a Sancta Magdalena de Canossa

fundatae essent, proinde etiam Canossianarum nomine nuncupatae sunt.

Serva Dei die 17 mensis Aprilis anno 1920 Modoetiae in Langobardia orta

est, quarta fı̀lia Caietani et Ioannae Sanctinae Cambiaghi parentum, et

sequenti die 21 ad regenerationis fontem paroeciae Deo in honorem Sancti

Blasii episcopi et martyris dicatae ducta.

Dolor autem et aegritudo Ferdinandae citius affecerunt domum: nam,

cum tribus modo mensibus nata esset, patre triginta et tres annorum orbata

est. Quem casum dolendum alius vero secutus est, cum decem et septem

mensibus post et soror eius Herminia, quae tunc nonum aetatis agebat an-

num, mortem obiit. Asperrima matri exinde exstitit vita, quae, tam iuvenis,

tantis iam affecta erat luctibus: eam, tamen, fides et spes sustinuerunt et

in caritatis perseverantem fecerunt virtute, quam Ferdinandae summopere

tradidit, venustatis decorisque et animi pudoris dotibus eximie suffultae.

Iam inde a pueritia suis fidelem sese exhibuit discipulae muneribus sive

in schola primi institutionis gradus, ubi optima gavisa est fama atque

existimatione, sive in aulis doctrinae christianae sacramentorum tradendae.

Die 26 mensis Iunii anno 1927, Confirmationem accepit et, die 3 mensis Maii

anno 1928, Primam Communionem. Eandem sedulitatem primo triennio

gymnasii ostendit, quibus expletis, familiae necessitatum causa ei studia

deserere laboremque negotiatricis apud tabernam institoriam exercere

necesse fuit.