Congregatio de Causis Sanctorum 517

In qua quidem perfectionis semita, quippe superna virtute ad ferenda

discrimina, iniurias iniustamque damnationem, usque ad effusionem sangui-

nis, confirmati, hi Servi Dei perseverarunt, qui exardescente bello civili,

scilicet ab anno 1936 ad annum 1939, dum inhumanis prorsus Ecclesia

insectationibus in Hispania petitur, pulchra sua fidei testimonia Christo

praebuere.

Cui manipulo martyrum Domus Sanctissimae Trinitatis, in oppido, quod

Hispani vulgo Alcázar de San Juan appellant, praeerat Pater Hermenegildus

ab Assumptione (Iza y Aregita), sacerdos professus Ordinis Sanctissimae

Trinitatis. Hic in pago Mendata-Albiz, intra fines Victoriensis dioeceseos,

die 13 mensis Aprilis, anno 1879, natus est, eodemque die lustrali sacri fontis

aqua expiatus est. Qui, ex perpetua votorum formula Ordinem ingressus, die

29 mensis Septembris, anno 1902, Beato Marcello S.R.E. Cardinali Spinola y

Maestre, Archiepiscopo Hispalensi, manus imponente, ad sacros ordines

ascendit. Cum autem die 21 mensis Iulii, anno 1936, portas eius asceterii,

in oppido Alcázar de San Juan, armatorum turba petiisset, iudex quidam

municipii, militibus comitantibus, cunctis sodalibus imperavit ut se seque-

rentur, quos quidem in carcerem ad tempus ipse deduceret. Ita Servus Dei,

nocturno tempore inter diem 26 et diem 27 eiusdem mensis, cum in eo carcere

iaceret, a militibus provocatus, una cum quattuor ceteris sacerdotibus

ignivoma manuballista prostratus est. Qui morituri dixere novissima verba:

« Vivat Christus Rex! ».

Pater Bonaventura a Sancta Catharina (Gabika-Etxebarria Gerrikabeitia),

sacerdos professus Ordinis Sanctissimae Trinitatis, in vico Ajanguiz, intra

fines Victoriensis dioeceseos, die 14 mensis Iulii, anno 1887, natus, eodem

nativitatis die baptismatis sacramento regeneratus est. Die vero 28 mensis

Septembris, anno 1906, ex perpetua votorum formula Ordinem Sanctissimae

Trinitatis ingressus, in urbe Malaca ad sacerdotii dignitatem evectus est.

Pater Franciscus a Sancto Laurentio (Euba y Gorroño), sacerdos professus

Ordinis Sanctissimae Trinitatis, in oppido Amorebieta, intra fines Victoriensis

dioeceseos, die 25 mensis Iulii, anno 1889, natus est, eodemque die baptisma-

te sancto rite ablutus est. Die 12 mensis Novembris, anno 1908, perpetuis

Deo votis se adstrinxit; die vero 23 mensis Decembris, anno 1911, Gienni,

quam urbem Hispani vulgo Jaén appellant, sacerdotio insignitus est.

Pater Placidus a Iesu (Camino Fernández), sacerdos professus Ordinis

Sanctissimae Trinitatis, Lacunae de Negrillis, intra fines Asturicensis dioece-