Acta Apostolicae Sedis - Commentarium Officiale486

deinceps diebus acerrima eaque implacabilis in Ecclesiam exarsit insectatio,

qua inter alia omne patrimonium artis et religionis Minoricensium incendio,

populatione, vastatione periit.

Ea tempestate, dum vexantur iniuriisque afficiuntur Christiani, Servi Dei

Martyrium factum est.

Die enim 23 mensis Iulii, anno 1936, primo vespere, milites tres minime

repugnantem domo in carcerem Servum Dei deduxerunt; qui haud multo

ante, ad impia facinora vel sacrilegia quaepiam vitanda, amoto Augustissimo

Sacramento, cum ingruentia iam pericula praesentiret, Sacratissimo Cordi

Iesu pagum consecraverat.

In aedibus vero municipii, in quas traductus est Ioannes, dux ille militum

qui eodem die in pagum Ferrerı́as advenerant, scilicet praedictus militaris

gubernator civitatis, hunc Servum Dei aliumque presbyterum sacram exuere

vestem contumeliose coëgit; ereptaque simul corolla quadam precatoria,

quam Ioannes intra vestem abdiderat, ballistula minatus ignivoma, ut eidem

inspueret imperavit. Summa ope adnisus est dux ut sacerdotem ad sacrile-

gium cogeret, quod idem valere poterat ac fidem Christi mutare; at ille,

confirmata voluntatis ad Martyrium inclinatione, quam ipse sacrorum alum-

nus pluries ostenderat, religionem violare recusavit et brachia distendens

«Vivat Christus Rex! » inquit. Ad quae cum statim igneis glandibus dux eius

faciem bis petiisset, Servus Dei, gravibus acceptis vulneribus, postquam

unam horam in acerbissimo mortis agone versatus est, extrema unctione ab

altero, qui aderat, illitus sacerdote, animam edidit.

Nuntio accepto Ioannem violenta morte periisse, quae ceterum pro mar-

tyrio confestim habita est, multi venerunt, qui linteola sua in eius sanguine

intinguerent, cum etiam milites quidam exanimatum corpus venerarentur.

Ideo in episcopali Curia Minoricensi, post Processum Ordinarium Informati-

vum super fama martyrii eiusque causa, a die 22 mensis Maii, anno 1953, ad

diem 21 mensis Aprilis, anno 1954, conditum, anno 1996 instructa est Inqui-

sitio dioecesana; quorum et singulorum vim processuum haec Congregatio de

Causis Sanctorum ratam habuit per Decretum die 14 mensis Februarii, anno

1997, latum. Positione confecta, more tralaticio disceptatum est num Dei

Famuli obitus pro martyrio haberi posset. Die autem 16 mensis Aprilis, anno

2010, habitus est Congressus Peculiaris Consultorum Theologorum. Purpura-

torum Patrum et Antistitum coetus, in Sessione Ordinaria quae die 17 mensis

Aprilis, hoc anno 2012, gesta est, cui praefui ego Angelus Cardinalis Amato,

audita relatione Exc.mi D.ni Xaverii Echevarrı́a Rodrı́guez, Episcopi titulo