14. De sancto Udalrico.

1 a. Gaude, caeli curia,
Recolens sollemnia
Udalrici praesulis,

1b. Gaude, orbis orbita,
Sole tanto praedita
Lucem dante populis.

2 a. Gaude, gaudens gaudio
Tam claro de filio,
O mater ecclesia.

2 b. Gaude libens promere
Corde, ore, opere
Tam sancti praeconia.

3 a. Gaude, sacer inclitis
Udalrice meritis
Florens ab infantia.

3 b. Gaude, qui ieiuniis
Instas et vigiliis

Flocci pendens noxia.

4 a. Gaude, verbi framea
Facis, Dei vinea

Ne sit hortus olerum.

4 b. Gaude, lingua aurea
Fidei ab area

Vepres vellis scelerum.

5 a. Gaude, plenus gratia,
Mentis nostrae spuria
Tua prece expia.

5 b. Gaude, dives gloria,
Nos Deo consocia
In caelesti patria.