1. De sanctissima Trinitate.

1. Ave, pater omnium

Rerum causatarum,
Fontale principium

Et finis ipsarum,
Tu mearum sordium

Et miseriarum
Mundator, da dulcium

Fontem lacrimarum.

2. Ave, plenum gratia

Verbum incarnatum,
In mea memoria

Iugiter sis gratum,
A me fuga otia

Et omne peccatum,
Me tecum in gloria

Gaudeam locatum.

3. Ave, sancte spiritus,

Omnis boni dator,
Imploro medullitus

Te ego peccator,
Ne me incompositus

Voret mortis lator,
Veni mihi caelitus,

Pius consolator.

4. Ave, felix unitas

In tribus personis,
Desit mihi foeditas

Per te Babylonis,
Abscedat severitas

Dira aquilonis
Me det laetum bonitas

Veri Salomonis.

5. Ave, sancta trinitas,

Unus tamen Deus,
Fugiat me pravitas,

Tu sis amor meus,
Assit mihi puritas,

Ne sim ultra reus,
Sim semper, o trinitas,

In te iubilaeus.