9. De Cruce Domini.

1. Ave, admirabilis

O crux benedicta,
Tua vis est nobilis

Semper et invicta,
Per te turba fragilis

Daemonum est victa,
Palma mihi stabilis

Sis contra delicta.

2. Ave, semper florida

O crux pretiosa,
Tua virtus vivida

Atque gratiosa
Mea sanet morbida

Membra et virosa.
Ne sint ultra foetida

Deo et exosa.

3. Ave, restitutio

O crux sanitatis,
Quae evacutio

Es infirmitatis,
A me sit remotio

Per te vanitatis
Atque restauratio

Omnis sanctitatis.

4. Ave, meum gaudium,

O crux dulce lignum.
Ornata per filium

Virginis benignum,
Sis contra daemonium

Mihi iuge signum,
Ne per iter devium

Imiter malignum.

5. Ave, mea gloria,

O crux, laus cunctorum,
Ad se traxit omnia

Per te rex caelorum,
A me fuga noxia

Cuncta vitiorum
Et me sic ad gaudia

Conduc gaudiorum.