11. In Ascensione Domini.

1. Ave, Iesu, gloriae

Summae dominator,
Qui ascendis hodie

Caelos triumphator,
Da, scandam ad veniae

Spem ego peccator,
Nam in me cotidie

Triumphat temptator.

2. Ave, Iesu propria

Vi qui caelos scandis,
Torpenti desidia

Mundo iter pandis,
Dona, ne me vitia

Copulent nefandis,
Sed ad caeli gaudia

Scandam cum salvandis.

3. Ave, Iesu manibus

Iunctis scandens caelum,
Post te ascendentibus

Ignitum das zelum,
Da meis erratibus

Medicinae velum,
Ut cum te sequentibus

Mortis vitem prelum.

4. Ave, Iesu, culmina

Qui scandis polorum,
Te sequuntur agmina

Plura beatorum.
Ut evadens fulmina,

Confer, infernorum
Apprehendam limina

Ianuae caelorum.

5. Ave, Iesu dextera

Qui nunc patris sedes,
Tenens super aethera

Potiores sedes,
Lege salutifera

Meos regens pedes,
Leva super sidera

Me ad caeli aedes.