12. De sanctissimo Sacramento.

1. Ave. manna angelorum,

Iesu vivens hostia,
Fons et arrha gaudiorum

Cuncta delens tristia,
Morum confer honestorum

Mihi exercitia,
Universa vitiorum

Fugans a me noxia.

2. Ave, panis mulcens gustum,

Qui cibus es grandium,
Tibi me grandem et iustum

Per pium fac studium,
Meum cor totum exustum

Per culpae incendium
Virtutum flore venustum

Fac, o cordis gaudium.

3. Ave, corpus Christi natum

Ex Maria virgine,
Dirae cruci conclavatum

Meo pro peccamine,
Misero mihi collatum

Empto tuo sanguine,
Munda, quaeso, me fuscatum

Peccati fuligine.

4. Ave, animae dulcedo,

Salutaris victima,
In te devota, ut credo,

Vegetatur anima,
Tibi, Iesu, totum me do,

O mea pars optima,
A me longe sit salsedo

Culpae amarissima.

5. Ave, virtus infinita,

Iesu, mea gloria,
In te spes, salus et vita,

Omnis boni copia,
Per te me ad te invita

Singulari gratia,
Sempiterna pace dita

In caeli me patria.