16. In Purificatione BMV.

1. Ave, Iesse virgula,

Fulgens stella maris,
Quae es sine macula,

Cur purificaris?
Ob te a me facula

Cedat lupanaris,
Et fecundent oscula

Vitae salutaris.

2. Ave, Iesu, manibus

Datus Simeonis
A familiaribus

Templo Salomonis,
Reple me virtutibus

Ceterisque bonis
Locum cum felicibus

In caeli dans thronis.

3. Ave, virgo, liberas

Bina ave natum,
Quem gignens conceperas

Nullum per peccatum,
Preces per fructiferas

Ipsi fac me gratum,
Libera per miseras

Culpas me ligatum.

4. Ave, Iesu, gerulum

Senem quia geris,
Qui tulit te parvulum

Brachiis sinceris,
Salva tuum servulum

Me a larvis feris,
Nec me mortis vinculum

Saevis claudat seris.

5. Ave, Iesu, filia

Anna Phanuelis,
En, tua praeconia

Decantat fidelis ;
Me non vincat bestia

Inferni crudelis,
Sed te cum victoria

Collaudem in caelis.