18. De beata Maria V.

1. Mater pia, mater dia,
Rei via, o Maria,

Ave, plena gratia,
O tenella Dei cella,
Interpella pro me, mella

Da de caeli curia;
Vitae porta, mundo orta,
Me conforta, ne distorta

Me collidant otia,
Decus morum, vas honorum
Fons hortorum, lux polorum

Mihi sis propitia.

2. Ara Dei, salus rei,
Robur spei cordis mei,

O dulce praesidium,
Expers maris stella maris
Praedicaris, stella paris

Solem, regem omnium.
Omni laude digna, plaude,
Semper gaude meque claude

Tuum intra gremium;
Mihi maesto nunc adesto,
Nam cor praesto semper gesto

Tuum in obsequium.

8. Reparatrix, imperatrix,
Mediatrix, consolatrix,

Ave, virgo regia,
Generose, gratiose,
Gaudiose, virtuose

Confer beneficia.
Urbs regalis, flos vernalis,
Fons vitalis, me a malis

Solve et miseria,
O optata advocata,
Mihi nata, mihi data,

Per te vincam omnia.

4. Imple bonis meum donis,
Quae in thronis Salomonis

Regnas, desiderium,
Rupta mora pacem rora,
Solve lora firmiora,

Quae trahunt ad vitium.
Culpae faecem, mentis necem
Ut per precem tuam secem,

Mihi da auxilium,
Virgo clara, Deo cara,
Mihi para nunc in ara

Caeli aevum gaudium.

5. Ave, rosa speciosa,
Veternosa et exosa

A me fuga odia,
Spes reorum, pes claudorum,
Lux caecorum, os mutorum,

Da, ut spevnam noxia.
Honor regis, amor legis,
Si me regis, vivi gregis

Me duc ad convivia,
Pio ductu sine luctu
Tuo fructu me iam duc tu,

Ut fruar in patria.