19. De beata Maria V.
Super Ave Maria.

1. Ave, o puerpera,
Flos virginitatis,
Praedulcis christifera,
Fons iucunditatis,

In succursum propera
Nobis tribulatis,

Pacis offer munera,
Solve a peccatis.

2. Maria, quae domina

Es universorum,
Placa per precamina

Regem supernorum,
Dele, terge crimina

Tuorum servorum,
Scribe nostra nomina

In caelo caelorum.

3. Gratia sufficiens,

Caeli ierarchia,
Miseros reficiens,

Dulcis, lenis, pia,
Te vocat deficiens,

Dum cadit in via,
Ad te clamat sitiens,

O dulcis Maria.

4. Plena donis gloriae,

Gratiae, naturae
Es, ut dicunt varie

Leges et scripturae,
Fer humanae sauciae

Opem creaturae,
Ut sit heres patriae

Nunquam transiturae.

5. Dominus te vestibus

Induit decoris
Et varietatibus

Vitae purioris,
Da, ut ipsum passibus

Sequamur amoris,
Salva a laboribus

Aeterni doloris.

6. Tecum regum dominus,

O felix puella,
Cur nos fugis eminus,

Quos collidunt bella?
Veni, veni comminus,

Stilla pacis mella,
Salva nihilominus

Mortis a procella.

7. Benedicta, lilium

Quae es castitatis,
Veni in auxilium

Nobis tuis natis,
Vince tuum filium

Prece pietatis,
Ut post hoc exsilium

Simus cum beatis.

8. Tu in mulieribus

Sola expers paris,
Clarior sideribus

Stella solem paris,
Quae prae sanctis omnibus

Plus auxiliaris,
Iunge caeli civibus

Nos, o stella maris.

9. Benedictus filius

Tuus, o sacrata,
Nostra ob te mitius

Detergat peccata,
Conculcetur fortius

Passio innata,
Dentur nobis ocius

Gaudia beata.

10. Fructus tuus, regia

Virgo et decora,
Veniat de regia

Poli absque mora,
Dona det cum venia

Nobis gratiora
Tua per suffragia,

Rutilans aurora.

11. Ventris tui solium

Christus cum subivit,
Reis in refugium

Se caeni univit,
Contra nos daemonium

Saeviens contrivit
Et contra exitium

Nos per te munivit.

12. Tui nati gratia,

Stella matutina,
Nos vinctos per omnia

Fraude Satanina
Fulci, tolle vitia,

Virtutes propina,
Tibi laus et gloria,

O caeli regina.