22. De sancto Achatio

1. Ave, miles Christi fortis,

Achati fortissime,
Pugil venerandae sortis

Stirpisque clarissimae,
Decem milium cohortis

O dux invictissime,
Qui vicerunt tecum mortis

Poenam iucundissime.

2. Ave, O virtus invicta

Et spes mea vivida,
Tuis precibus delicta

Mea dele livida,
Mea mens Deo non ficta

Recta sit et pavida
Et libido a me victa

Iam abscedat lurida.

3. Ave, martyr pretiose,

Forma patientiae,
Triumphavit gloriose

Princeps in te gloriae,
Da, ut obstem nebulosae

Daemonum nequitiae,
Iesu Christi gaudiosae

Coniungar militiae.

4. Ave, tot candidatorum

Martyrum vexillifer,
Qui virtutum atque morum

Cunctis es odorifer,
Tu meorum peccatorum

Veniae sis signifer,
Et procul mihi malorum

Sit exactor letifer.

o. Ave, qui cum delicato

Tuo contubernio
Gaudens in caelesti prato

Frueris convivio,
Interventu iunge grato

Tali me solacio,
Ut conviva cum beato

Regnem Dei filio.