25. De sancta Agnete.

1. Ave, veris primula,
Paradisi rosula,

Agna, Deo grata,
Honoris triclinium,
Lilium convallium,

O candidulata;
Omnis neglegentiae
Meae et stultitiae

Detergens peccata
Gratiae charismata,
Virtutum aromata

Confer, o sacrata.

2. Ave, dulcis cithara,
Dulcior quam zuchara,

Agna, nux dulcoris,
Oliva fructifera,
Nardus odorifera,

O lampas decoris ;
Festina velocius,
Fugans a me ocius

Languorem maeroris,
Veni, veni, propere,
Salva me a Venere,

O gemma pudoris.

3. Ave, meum gaudium,
Meum patrocinium,

Agna, lux aestatis.
Dulcis mea viola.
Nunquam in me viola

Fidem caritatis;
A malo me erue,
Faeces omnes ablue

Meae pravitatis,
Omne malum remove,
Omne bonum promove

In me sanctitatis.

4. Ave, austro purior,
Plus sole fulgidior,

Agna o praeclara,
Balsamo praestantior,
Stellis scintillantior,

Sponsa Christo cara;

Sine paenitentia
Ne mortis angustia

Me claudat amara,
Pietatis oculo
Respice me sedulo,

O caelestis ara.

5. Ave, melle dulcior,
Ebore candidior,

Agna generosa,
Turture simplicior
Et auro nobilior,

Rubens plus quam rosa;
Tua per precamina
Ad caelorum limina

Ducar gaudiosa.
Ubi tecum dulciter
Perfruar perenniter

Vita gloriosa.