26. De sancta Agnete.

1. Ave, Agna, natu clara,
Vultu decens, actu gnara,
Audi me ad te clamantem
Et exaudi suspirantem.

2. Ave, felix et beata
Agna, Christo consecrata,
Aurem ad me huc inclina,
Tolle moras et festina.

3. Ave, Agna, tota munda,
Me totum immundum munda,
Vulnus mentis meae sana,
Fuga cuncta a me vana.

4. Ave, sponsa Deo digna,
Martyr dulcis et benigna,
Solve ad finalem punctum
Regnans in me malum cunctum.

5. Ave, Agna, flos vernalis,
Lava me a cunctis malis,
Transfer impolluto calle
Me ex mundi huius valle.

6. Ave, innocens columba,
Me duc ex peccati tumba,
Mihi confer cor contritum,
Omni bono redimitum.

7. Ave, o bellatrix fortis,
Salva me de portis mortis,
Aufer a me pravos motus
Per te mundus fiam totus.

b. Ave, Agna, lux novella,
Fulgens cordis mei stella,
Me reforma plene Deo,
Dulci redemptori meo.

9. Ave, Agna, tua dextra
Sana me intus et extra.
Tua me tutela fove
Et sic ad virtutes move.

10. Ave, Agna, virgo casta,
Hora mortis mihi asta,
Ne quidquam mihi molesti
Irrogent hostes funesti.

11. Ave, Agna, vas virtutum,
Contra Satan te da scutum,
Tuta me ab Orci valva
A secunda morte salva.

12. Ave, Agna, meum lumen,
Duc ad caeli me cacumen,
Ubi per tuum precamen
Deum semper laudem. Amen.