30. De sancta Anna.

1. Ave, Anna, regia

Quae de stirpe flores,
Morum spargens lilia

Virtutumque flores,
Pia mihi studia,

Deprecor, ut rores,
Ne perdam per vitia

Caelicos honores.

2. Ave, tu quae concipis,

Anna, tres Marias,
Cunctis per hoc proficis,

His ut salus fias,
Inclinor, si despicis

Me, ad mortis vias,
Hinc funde, nam sufficis,

Preces pro me pias.

3. Ave, sanctae virginis

Anna dulcis mater,
Ad hoc veri luminis

Elegit te pater,
Da, ut Dei nominis

In laude dilater,
Assis, ne me criminis

Fallat auctor ater.

4. Ave, quae in habitu

Florebas legali,
Fruens sine strepitu

Serto coniugali,
Precibus me spiritu

Firma principali,
Ut nihil in obitu

Me contristet mali.

5. Ave, quae pauperibus,

Anna, res partiris
Tuas indigentibus

Feminis et viris,
Mihi maius omnibus

Munus tu largiris,
Conregnem caelestibus,

Si Deum requiris.