43. De sancto Georgio.

1. Ave, Cappadociae

Princeps trabeate
Georgi egregie,

Verna Dei grate,
Felici custodiae

Scutum mihi da te,
Ut totus in gratiae

Sim felicitate.

2. Ave, nam aethereum

Te ducis profani
Levat in eculeum

Furor Daciani,
Fac, ne me erroneum

Ritus foedent vani,
Sed regnum sidereum

Mores dent urbani.

3. Ave, Athanasium

Magum, cum bibisti
Datum virus, devium

Fidei dedisti,
Me vagum et ebrium

Mundi cursu tristi
Pia prece sobrium

Redde scholae Christi.

4. Ave, rota ensibus

Quando fabricatur,
Totum tuum talibus

Corpus ut scindatur,
Dei rupta nutibus

Prorsus dissipatur ;
Tuis sic precatibus

Satan conteratur.

5. Ave, qui sartagine

Ignita cremaris,
Tibi Iesu nomine

Caelos sic mercaris,
Tu in caeli limine,

Ubi principans,
Me tuo precamine

Christi iunge caris.