47. De s. Iacobo Maiore.

1. Ave, qui maior vocaris

Iacobe, apostole,
Te terrarum atque maris

Venerantur incolae,
Ut mihi miserearis,

Servo tuo, recole
Virtutisque salutaris

In me fructus excole.

2. Ave, sator verbi Dei,

Per terras Hispaniae,
Te honorant iubilaei

Incolae Galatiae,
Tibi iusti atque rei

Dant laudes laetitiae,
Miserere ergo mei,

O lampas ecclesiae.

3. Ave, salus animarum,

Flos divini germinis,
Vere sidus tu praeclarum

Inexhausti luminis,
Mearum velox culparum

Dele labem criminis,
Fluat mihi gratiarum

Per te vena fluminis.

4. Ave, gemma claritatis,

O fili tonitrui,
In te meae sanctitatis

Spem totam deposui,
Me ex lacu vanitatis

Duc, in quo evanui,
Pro meis ora peccatis,

Quibus miser tabui.

5. Ave, speculum virtutum,

Mea spes et gloria,
Iter para mihi tutum

In Dei militia,
Te pro me in morte scutum

Da contra daemonia,
Virtute loca indutum

Me in caeli curia.