49. De s. Iacobo Minore.

1. Ave, Ierosolymae

Digne praesularis,
Iacobe sanctissime,

Qui minor vocaris,
Te collaudant animae,

Quas Deo lucraris,
Mihi, precor intime,

Ut miserearis.

2. Ave, mundi omnia

Qui spernis gaudenter,
Precis tuae gratia

Adesto volenter
Mihi contra vitia,

Ut surgam recenter,
Nulla me ludibria

Laedant violenter.

3. Ave, fugans zabulum

Factis caritatis,
Solve prece vinculum

Meae pravitatis,
Nequaquam sim stabulum

Ultra vanitatis,
Sed sim receptaculum

Omnis sanctitatis.

4. Ave, carnis gloriam

Frangens abstinenter
Da, ut abstinentiam

Diligam frequenter,
Ne per Gastrimargiam

Consumar fallenter,
Ut non ignominiam

Sufferam nocenter.

5. Ave, qui martyrio

Te tulisti pronum,
Da sine fastidio

Vitae sanctae donum
Et sine supplicio

Omne mihi bonum,
Spreto mundi gaudio

Caeli scandam thronum.