50. De s. Iohanne Baptista.

1. Ave, Iohannes praeclare,

Qui baptizas Dominum,
Orare pro me dignare

Deum, patrem luminum,
Sordes meorum mundare

Ut dignetur criminum
Et sanctis coadunare

Me post vitae terminum.

2. Ave, qui virginitate

Angelis es similis,
Nulla carnis foeditate

Maculatus fragilis,
Da, ut sim in castitate

Vitae semper stabilis
Et in omni sanctitate

Deo acceptabilis.

3. Ave, ardens sanctitatis

Lucerna et lucida,
Praeco merae veritatis

In doctrina fulgida,
Da, ut meae vilitatis

Plangam mala foetida
Et per viam caritatis

Curram mente avida.

4. Ave, o plus quam propheta

Domini sanctissime,
Mihi assiste, athleta

Christi invictissime,
Non me pungat ardor, veta,

Culpae iniquissimae,
Sed sit mens ad bonum laeta

Mea frequentissime.

5. Ave, qui vicisti mortem

Sub Herode impio,
Cum ad salutaris sortem

Finitus es gladio,
Tyrannum inferni fortem

Tuo vincam brachio,
Sanctorumque me consortem

Fac in caeli gaudio.