51. De s. Iohanne Evangelista.

1. Ave, sidus caelicum,

Iohannes sacrate,
Lumen evangelicum

Morum gravitate,
Cor geris angelicum

In virginitate,
Spiritum paraclitum

Da, ne spernar a te.

2. Ave, generatio

Laudat redemptoris
Te, mihi protectio

Omnibus in horis
Sis et relevatio

A peccati loris,
Mihi consolatio

Sis intus et foris.

3. Ave, qui restituis

Vitam Drusianae
Iuvenemque imbuis,

Mentis ut sit sanae,
Factis frui strenuis

Da nec vivam vane,
Ne damner cum nocuis

Poenis inhumane.

4. Ave, ad convivium

Qui vocaris caeli,
Meum prece vitium

Deterge fideli,
Largire initium

Boni mihi zeli,
Ne sim per flagitium

Peior infideli.

5. Ave, pudicitiae

Gemma singularis,
Qui a dono gratiae

Gratia vocaris,
Pro me regi gloriae,

Precor, ut loquaris,
Ut caelestis curiae

Collocer in aris.