56. De sancto Leonhardo.

1. Ave, felicissime

Leonarde grate,
Clares qui clarissime

Clara claritate,
Tuae potentissimae

Precis potestate
Corporis et animae

Laeter sospitate.

2. Ave, qui silentia

Diligis deserti,
Tua beneficia

Plures sunt experti,
Ultra non ad vitia

Me sinas converti,
Sed ad vitae stadia

Duc ductu sollerti.

3. Ave, qui puerperae

Succurris reginae
Opem salutiferae

Praestans medicinae,
Ne succumbam misere

Beatus ruinae,
Me virtutis munere

Muni sine fine.

4. Ave, qui dolentibus

Et captis salutem
Das et te petentibus

Miram per virtutem,
Fac, ne pravitatibus

A bono me mutem,
Sed cum sanctis actibus

Satanam confutem.

5. Ave, qui iam gaudia

Tenes gaudiorum
Super cuncta dulcia

In regno caelorum,
Tua per suffragia

Coetui sanctorum
Per saecla me socia

Tecum saeculorum.