60. De sancta Margareta.

1. Ave, o ingenua

Dulcis Margareta,
Vana et fellitum

Mundi transis freta,
Satanae tu cornua

Calcas inquieta,
Pro me flecte genua

Deo mente laeta.
2. Ave, in me tabuit

Lumen rationis,
Et fructus, heu, marcuit

Bonae rationis,
Torpor me absorbuit

Indurationis,
Proh pudor, praevaluit

Faex confusionis.

3. Ave, nunc confugio

Ad te cum pavore,
Ut sim sub refugio

Tuo tutiore,
Namque culpae vitio

Pro sordidiore
Scio Dei filio

Me ingratum fore.
4. Ave, aures precibus

Imple salvatoris
Pro cunctis reatibus

Mei peccatoris,
Ut solvar ab actibus

Vitae vilioris,
Ne involvar ignibus

Aeterni doloris.

5. Ave, tua gratia

Gaudeam sanatus,
Ab omni miseria

Culpae serenatus,
Sim in conscientia

In Christo fundatus,
Conregnem in gloria

Ipsi sociatus.