62. De s. Maria Magdalena.

1. Ave, clari generis

Dulcis Magdalena,
Universi sceleris

Quae fuisti plena,
Illustravit sideris

Te caelestis vena,
Fructum vitae foederis

Degustas amoena.

2. Ave, quae convivia

Felix introisti,
Ubi Iesum copia

Balsami unxisti,
Pedes abundantia

Lacrimae lavisti,
Quos crinis decentia

Osculans tersisti.

3. Ave, te cleraentiae

Dei mundat norma,
Quae es paenitentiae

Speculum et forma,
Me oboedientiae

Divinae reforma
Et benevolentiae

Ipsius conforma.

4. Ave, quae iam pabulo

Vitae regionis
Frueris, a poculo

Me nunc Babylonis
Salva et a vinculo

Educ Pharaonis,
Ne plectar venabulo

Dirae ultionis.

5. Ave, o discipula

Christi redemptoris,
Funda propugnacula

Boni in me moris
Et ad fontem stimula

Me Dei amoris,
Ut vivam per saecula

In regno decoris.