64. De sancta Martha.

1. Ave, Martha inclita,

Decens et formosa,
Salvatoris hospita,

Tota gratiosa,
Per virtutis merita

Tuae gloriosa
Cuncta solve debita

Mea scelerosa.

2. Ave, fame tenerum

Corpus quae fregisti
Submersumque puerum

Vitae reddidisti,
Me de morte scelerum

Sorti redde Christi
Addens cursum prosperum

Hoc in mundo tristi.

3. Ave, tuis manibus

Quae ligas draconem
Praestans pereuntibus

Exsultationem,
Fer de culpis omnibus

Absolutionem
Mihi et cum coetibus

Caeli mansionem.

4. Ave, regem Franciae

Mulcens Chlodovaeum
Sospitati gratiae

Cura reddens eum,
De peste nequitiae

Sanum me fac reum,
Precibus clementiae

Mihi placans Deum.

5. Ave, florens floribus

Hospitalitatis,
Necesse habentibus

Offers tua gratis,
Vivis me virtutibus

Ditans caritatis
Poli tecum civibus

Socia beatis.