65. De sancto Martino.

1. Ave, Dei pontifex
Et virtutum opifex

Martine beate,
Genetrix Panonia,
Tua te Italia

Nutrix laudant grate.
Manus tuas commoda
Ad meae incommoda

Mentis sceleratae,
Sana me interius,
Exorna exterius

Morum gravitate.

2. Ave, qui cooperis
Nuditatem pauperis

Chlamyde partita,
Tua per suffragia
Nulla per contraria

Vincar in hac vita.
Mea mens per misera
Non laedatur, prospera

Virtute vestita,
Tuis sic auxiliis
Atque beneficiis

Spe fruar cupita.

3. Ave, spernens saeculum
Militumque cingulum,

Gaudia stultorum,
Ad baptismi lavacra
Volas et simulacra

Deicis deorum;
Da mihi, ut omnia
Mundi spernam gaudia

Cum melle eorum,
Et me fac proficere
In virtutum munere

More beatorum.

4. Ave, qui restituis
Tribus vitam mortuis

Tua prece pura,
Animae restitue
Meae sensum mortuae

Medela secura;
Post odorem currere
Tuum fac et capere

Me regna mansura,
Nullum me illicitum
Trahat vel prohibitum
Ad mala futura.

5. Ave, cuncta saecula
Per multa miracula

Qui illustras late,
Et sic intras gaudia
Iucunde caelestia

Plenus sanctitate,

Me sequi velociter
Te fac et feliciter,

Non disiungar a te;
Iunctus sanctis omnibus
Vivam in caelestibus

Cum iucunditate.