66. De sancto Matthaeo.

1. Ave, beate Matthaee,

Lucerna fidelium,
Qui genti primum Iudaeae

Scribis evangelium,
Audi vocem precis meae,

Mihi sis praesidium,
Turbae iungens iubilaeae

Me post hoc exsilium.

2. Ave, qui ex publicano

Vas es factus gratiae,
Me a cogitatu vano

Solve omnifarie
Et me ab actu mundano

Trahe et lasciviae,
Serviam ut christiano

More regi gloriae.

3. Ave, spargis verbum Dei

Qui in Aethiopia,
Cum sis virtus meae spei,

Corona et gloria,
Quaeso, memor esto mei

In mea miseria,
Ut vincam iure tropaei

Cuncta mundi noxia.

4. Ave, patent Orci portae

Tuum ad imperium,
Quando suscitas a morte

Saeva regis filium,
Ut sim bona, da, sub sorte,

Ferens opis brachium,
Et tuere me, ne forte

Tradar ad exitium.

5. Ave, digne laurearis

Qui cruore proprio
Et tibi vitam mercaris

Percussoris gladio,
A flammis solvas amaris

Tuo me subsidio,
Ut vivam cum Dei caris

In caelesti solio.