67. De sancto Mathia.

1. Ave, stirpis nobilis

O sancte Mathia,
Pro Iuda laudabilis

Surgis sorte pia,
Prece da, ut stabilis

Sim in vitae via,
Et mihi placabilis

Vera sit sophia.

2. Ave, sacra semina

Spargens in Iudaea,
Deterge peccamina

Apud Deum mea,
Fugiant temptamina

Per Christi tropaea,
Mea mens ad carmina

Surgat iubilaea.

3. Ave, qui gratifica

Caecos sospitate
Curans a tabifica

Sanas caecitate,
Succurrens mirifica

Tua pietate
Ab omni salvifica

Me iniquitate.

4. Ave, vitam mortuis

Pluribus modesta
Qui virtute tribuis,

Me duc ad honesta,
Non mala cum fatuis

Subeam funesta,
Cum sanctis praecipuis

Dei agam festa.

5. Ave, morti subderis

Quando transiturae,
Christo statim iungeris

Conregnans secure,
Tibi, sicut poteris,

Iungere sit curae
Me vitae, qua frueris,

Semper permansurae.